Parlamenti refuzoi fjalimin e Spahiut

Parlamenti i Shqipërisë ka refuzuar kërkesën e nënkryetarit të Këshillit të Lartë të Drejtësisë Kreshnik Spahiu për të folur në seancën plenare. Refuzimi i kërkesës së Spahiut, Kuvendi e argumenton me faktin se është në kundërshtim të rregullores së Parlamentit.

“Në përgjigje të shpresës suaj nr 105, datë 26.01.2012 luteni të lexoni rregulloren e Kuvendi të Shqipërisë. Ju nuk mund të flisni në seancë pleanre” thuhet në shkresën e Parlamentit drejtuar Spahiut.

Ndërkohë Nënkryetari i Këshillit të Lartë të Drejtësisë Kreshnik Spahiu i dërgoi më herët një letër kryetares së Kuvendit Jozefina Topalli ku i kërkonte kësaj të fundit t`i japë të drejtën për të folur në seancën plenare të Kuvendit.

Ndërsa ka kujtuar largimin e tij nga komisioni i ligjeve, Spahiu ka theksuar se komisioni i ligjeve i ka mohuar të drejtën e fjalës prandaj ai duhet të flasë në seancën plenare përpara se Kuvendi të japë një vendim për nisjen e procedurës së shkarkimit të tij.

Në letrën e tij, Spahiu thekson se Parlamenti ka detyrim kushtetues që të dëgjojë argumentat e tij, në mënyrë që të garantohet një proces i rregullt ligjor.

Ndërkohë Parlamenti miratoi sot vetëm me votat e maxhorancës ngritjen e Komisionit Hetimor për shkarkimin nga detyra të nënkryetarit të Këshillit të Lartë të Drejtësisë, Kreshnik Spahiu.

Kërkesa e paraqitur nga disa deputetë të Partisë demokratike mori 73 vota pro dhe 57 kundër ndërsa deputetët e opozitës ashtu siç e paralajmëruan më herët nuk e votuan ngritjen e komisionit. (INA)