Arrestohet shqiptari i përfshirë në rrëmbimin e gazetarit grek

Një gazetar grek, 28 vjeçar, drejtues i një emisioni shumë të njohur programi mëngjesi në televizion kombëtar grek, u mor peng nga katër persona ku njëri ishte shqiptar dhe sot ra në pranga.

Ngjarja i ka fillesat në 24 qershorin e kaluar kur gazetari 28 vjeçar u mor peng në banesën e tij në Athinë, raporton agjencia e lajmeve NOA. Në foto po shikoni pallatin ku u krye rrëmbimi.

Ishte një 47 vjeçar shqiptar i cili së bashku me dy shtetas nga Moldavia, përkatësisht 26 dhe 30 vjeç, ata të cilët rrëmbyen gazetarin.

Keqbërësit i zunë pritë tek ashensori i pallatit dhe pasi e çuan në parking i vunë një maskë në kokë dhe pranga në duar.

Më tej e çuan me një makinë, pronë e 47 vjeçari shqiptar, në zonën e Varvarovis. Atje, i riu u mbajt peng për 16 ditë me radhë. Rrëmbyesit njoftuan familjen dhe i thanë se nëse e donin sërish të gjallë duhet të paguanin 4 milionë euro dhe të mos lejonin që të fuste hundët policia.

Bisedat telefonike që bënë agresorët me babanë e gazetarit i cili gjendej në Qipro, bënë që të bihej dakord për të paguar një milion euro.

Pagesa u bë më 10 korrik 2011 dhe rrëmbyesit e lanë të lirë pengun e tyre. Ata e lanë të braktisur në një rrugë në periferi të Athinës, por policia refuzoi të detajojë si u bë shkëmbimi i një milion euro me pengun.

Gjatë gjithë kësaj kohe deri sot në mëngjes, asgjë nuk dihej për rrëmbyesit. Gazetari i tha policisë se për 16 ditë rresht u mbajt me kapuç në kokë dhe asnjëherë nuk pati rastin t’i shihte rrëmbyesit e tij por kishte kuptuar se nuk ishin grekë.

Policia me arrestimin që i bëri sot 47 vjeçarit shqiptar tha se sekuestroi dhe makinën me të cilën u krye pengmarrja.

Kurse ka zbardhur dhe skemën e rrëmbimit. Shqiptari dhe dy moldavët kishin punuar në pallatin ku jetonte gazetari, pak muaj para se ai të banonte atje. Kishin mësuar se i ati i gazetarit kishte para dhe se kishte blerë tre apartamente në pallatin që po ndërtohej.

Duke qenë se njihnin dhe strukturën e ndërtesës, kishin hyrë pa vështirësi dhe kishin përgatitur planin e rrëmbimit që u funksionoi.

Ndërkohë, 47 vjeçari shqiptar tha se kishte marrë 250 mijë euro nga shuma një milion që morën. Ai tha se nuk i kishte paratë sepse i kishte dërguar në Shqipëri. 750 mijë euro i morën tre moldavët të cilët ishin larguar për në Moldavi dhe nuk janë kthyer më. (NOA/INA)