|
Kompania ruse e gazit “Gazprom” pas investimeve të saj në Serbi, po shqyrton mundësinë e hyrjes edhe në Maqedoni. Qeveria e Maqedonisë, gjegjësisht kryeministri Nikolla Gruevski ka shfaqur interes të lartë për të hyrë kompani ruse e gazit, e cila shikohet si një partner serioz për ndërtimin e sistemit të gazsjellësit në Maqedoni.
Ministri i Financave, Zoran Stavrevski në një intervistë për agjencinë e lajmeve ruse, Itas Tass ka theksuar se Shkupi zyrtar ka interesa të mëdha për të tërhequr gjigantin rus të gazit. “Duke u nisur nga projekti i Qeverisë për gazifikimin e vendit, mendoj se interesi është i qartë për bashkëpunim me Gazprom. Ne mendojmë që përmes projektit me Gazprom të mbyllim borxhin e kliringut që Federata Ruse i ka Maqedonisë me një vlerë prej 60 milion dollarë”, ka theksuar ministri Stavrevski.
Edhe ambasadori rus në Shkup, Vladimir Solocinski ka paralajmëruar nënshkrimin e projektit brenda dy muajve për realizimin e gazifikimit të Maqedonisë nga kompania ruse Gazprom. Për ndërtimin e gazsjellësit nevojiten 200 milion euro, ndërsa në realizimin e këtij projekti ka paralajmëruar participimin edhe Qeveria. (INA)
|